Informashon di personanan ku konosé e mucha òf e famia bon

Informantenan

E personanan ku konosé e mucha bon i ku ta duna informashon pa e investigashon di e konseho, yama informantenan. Un informante por ta por ehèmpel un miembro di famia òf un persona ku a base di su trabou ta embolbí ku e mucha òf e famia, manera un maestro òf e dòkter di kas.

E investigadó di e konseho ta bisa e mayornan adelantá ku ken e ta bai papia. E mayornan mester duna pèrmit pa esaki. Tin bia e ta bai papia tambe ku personanan ounke mayornan no a duna pèrmit. Hurídikamente Voogdijraad CN tin mag di hasi esaki si e ta den interes di e mucha. E ta splika esaki e ora ei na e mayornan i ta bisa e informante esei tambe. E investigadó di e konseho mes ta determiná kua informante e ta pidi. E mayornan por proponé un informante, pero e de investigadó di e konseho no ta obligá pa pidi e informante akí.

E kontakto ku e informante

E investigadó di e konseho ta splika dikon e kier informashon di e informante. E investigadó di e konseho hopi bia por divulgá masha poko tokante e investigashon, pa protehá privasidat di mucha i mayornan. Esaki ta konta tambe si e informante ta embolbí ku e mucha òf e famia a base di su trabou. E informante mes ta determiná si e kier kooperá ku e investigashon di e konseho. Niun hende ta obligá di duna informashon.

Informashon di e informante

E investigadó di e konseho ta puntra kiko e informante sa di e desaroya i e situashon na kas di e mucha. E por hasi pregunta tokante salú di e mucha, su komportashon i su prestashonnan na skol.

Despues di e investigashon di e konseho ta sigui e rapòrt di e konseho. Akiden e investigadó di e konseho ta skirbi kon e situashon di e famia ta, kon e investigashon a bai i kiko el a tende i mira. E informashon di e informante ta bin tambe den e rapòrt di e konseho, despues ku e informante a aprobá e teksto.

E investigadó di e konseho por partisipá e resultado di e investigashon na un informante ku a base di su trabou ta embolbí ku e mucha òf e famia. E investigadó di e konseho ta hasi esaki solamente si esei ta den interes di e mucha.

Voogdijraad no ta paga pa informashon

Sa sosodé ku informantenan ta pidi un pago pa suministro di nan informashon tokante mucha-/mayornan. Pero Voogdijraad CN no ta paga pa informashon ku ta nesesario pa por evaluá protekshon i desaroyo di muchanan korektamente. Esaki ta konta pa tur embolbimentu di Voogdijraad CN. Tin un kantidat motibu pa esaki.

Voogdijraad kier prevení ku por surgi duda tokante imparsialidat, konfiabilidat i integridat di e kolaboradónan di e konseho i di e organisashon, pasobra ta paga pa informashon. Tambe Voogdijraad ta mustra informantenan profeshonal riba e responsabilidat legal mutuo pa siguridat i desaroyo di muchanan. E obligashon di kuido aki, ku suministro di informashon na entre otro Voogdijraad tambe por ta parti di dje, ta un parti normal di e trabou di profeshonnan profeshonal.

Banda di esei Voogdijraad kier vigilá pa no tin desigualdat legal. Un situashon kaminda un informante si ta haña pago i e otro no, no ta deseabel. Esei lo nifiká desigualdat legal pa informantenan, pero tambe pa mucha-/mayornan. No por splika bon dikon ta paga pa informashon relashoná ku sierto mucha òf mayor si i pa un otro no.

Fuera di esei e desishon pa suministrá informashon na Voogdijraad ta keda di e informante. Kada informante mes semper mester hasi un evaluashon a base di e preguntanan di e kolaboradó di e konseho, si suministro di informashon ta nesesario i korekto. E profeshonal ta liber, den kuadro di su responsabilidat profeshonal, pa no kompartí informashon. E ta duna kuenta i rason tokante esei (si ta nesesario) den su propio grupo di profeshonal.