Kon un investigashon di e konseho ta bai?

Pa e investigashon e investigadó di e konseho ta traha un plan di investigashon, huntu ku un eksperto di kondukta i tin bia tambe ku e kolaboradó hurídiko. Akiden tin pará kiko e problema ta i ku ken e ta bai papia. E intenshon ta pa e haña un bista kompletu di e situashon di e mucha. Na komienso di un investigashon di e konseho ta invitá klientenan pa un kombersashon den kua e investigadó di e konseho ta splika kiko ta e motibu pa e investigashon, e meta, e proseduranan ku ta sigui i kon largu e investigashon ta dura.

E investigadó di e konseho ta papia ku e mayornan, ku e mucha i otro miembronan di famia òf personanan embolbí.

Si e investigadó di e konseho no por papia ku e mucha, e ta trata pa mira e mucha si. Pa haña un bon bista di e situashon e investigadó di e konseho por buska informashon tambe serka otro personanan, manera personanan ku konosé e mucha bon, manera un miembro di famia, e dòkter di kas òf un maestro. Pa esaki tin mester di pèrmit di e mayor(nan) enkargá ku outoridat. Tambe Voogdijraad CN por pidi datonan hudisial, por ehèmpel si nan ta hasi un investigashon den kuadro di famianan di kriansa, adopshon òf un persona so ku tin outoridat.

E kombersashonnan por ta na kantor di Voogdijraad CN òf serka e famia na kas. E investigadó di e konseho ta konsultá ku e eksperto di kondukta i e kolaboradó hurídiko, promé ku e skirbi e rapòrt.

Den e rapòrt e investigadó di e konseho ta skirbi kiko ta situashon di e famia, kon e investigashon a bai i kiko el a tende i mira. Den e rapòrt e ta duna un konseho kaminda e ta wak kiko ta mihó pa e mucha. E rapòrt akí e ta diskutí ku e mayornan i ku e mucha, si e mucha ta mas grandi. Mayornan i e mucha ta risibí e rapòrt di e konseho 5 dia di trabou pa tuma nota di dje, a ménos ku esaki no ta interes di e mucha.

Dependiendo di kua investigashon ta trata, diferente tipo di akshon ta posibel. Si un mucha por ehèmpel a hasi algu ku pa lei no tin mag, e ora ei tin pará den e konseho kua kastigu ta mas adekuado. Si ta trata di problemanan na kas, e ora ei e investigadó di e konseho por entregá un petishon na hues pa un medida di protekshon hubenil. Si ta trata di un divorsio ku konflikto, e ora ei den e konseho por tin pará serka ken ta mihó pa e e muchanan biba.

Ora e rapòrt ta kompletamente kla, e investigadó di e konseho ta mand’é e ora ei pa e mayornan i tin bia tambe pa e mucha. Dependiendo di e tipo di investigashon e ta manda e rapòrt tambe pa hues, fiskal òf ministerio di Siguridat i Hustisia. Na kende eksaktamente, esei bo ta lesa na kada tópiko.