Kiko outoridat di mayor ta nifiká?

Eduká i kuida e yu

Lei ta bisa ku bo mester sòru pa bienestar físiko i mental di bo yu. I ku bo mester yud’e desaroyá su personalidat. Bo no por maltratá òf neglishá e yu mentalmente òf físikamente. I bo mester promové e laso di e yu ku e otro mayor.

Paga pa edukashon i kuido

Mayornan ku outoridat mester paga pa kriansa i edukashon di nan yunan. E obligashon di kriansa pa yu aki ta stòp asina ku e yunan tin 21 aña. Tambe ora e mayornan divorsiá, òf ora nan kontrakt di konvivensia ta stòp, nan mester palabrá un areglo finansiero. Esaki yama alimentashon.

Aktonan ofisial na nòmber di e yu

Mucha te ku 18 aña generalmente no por hasi aktonan ofisial independientemente, a ménos ku hues a deklará nan mayor di edat. Por ehèmpel, nan no por pone firma òf hiba un kaso den korte. Ora mayornan tin outoridat riba un yu, nan por hasi aktonan ofisial na nòmber di e mucha. Por ehèmpel:

• Registrá e yu na un skol.
• Pidi un pasport pa un yu.
• Duna pèrmit pa trato médiko.

Responsabel pa daño

Sigun lei, mayornan òf tutor ta responsabel pa loke nan yu hasi. E ora ei, mayornan por ehèmpel mester paga e gastunan ora nan yu kousa daño. Den mayoria kaso, esaki ta konta te ora un mucha tin 14 aña. Ora un yu tin 14 òf 15 aña, por tene tantu e mayor komo e yu mes responsabel. For di 16 aña, un yu mes ta responsabel tur ora.

Maneho di fortuna di yu

Ora bo tin e outoridat di mayor, bo mester manehá e kapital di un yu. Si bo no hasi esaki bon, bo ta responsabel pa daño ku esaki por kousa. Por ehèmpel, ora e yu a heredá sèn i un mayor usa e sèn aki pa su mes.