Medidanan di protekshon di mucha

Pone bou di supervishon
Den kaso di pone bou di supervishon ta apuntá un tutor di famia pa e mucha pa un periodo di máksimo 1 aña. Un tutor di famia ta konsehá tokante edukashon i ta hasi palabrashon tokante esaki ku e mayornan. E mucha ta keda biba gewon na kas i e mayornan mes ta keda responsabel pa e mucha. Pero nan ta obligá si pa kooperá ku konsehonan i e palabrashonnan ku e tutor di famia. E mayornan ta tuma desishonnan importante tokante e mucha huntu ku e tutor. Un tutor di famia ta traha na Kuido i Hubentut Hulanda Karibense (ZJCN).

Ora ku e periodo di pone bou di supervishon ta serka di vense, e tutor di famia por duna di konosé:

• Ku ta nesesario pa prolongá esaki. Hues e ora ei ta disidí riba prolongashon di máksimo 1 aña.

• Ku kos ta bai bon i ku por sigui hasi uso di ayudo den e kuadro boluntario. Un kolaboradó di Voogdijraad ta evaluá si e problemanan ta solushoná i si e situashon di e mucha ta na òrdu atrobe.

Pone bou di supervishon temporal
Si e situashon ta kore peliger agudo, e investigadó di e konseho por pidi hues pa imponé pone bou di supervishon urgentemente i tin bia tambe pa interná pafó di kas. E investigadó di e konseho ta pone e mayornan mesora na altura di esaki. Pero e no mester hasi un investigashon profundo.

Si hues bai di akuerdo ku pone bou di supervishon temporal, e mucha ta haña e ora ei mesora un tutor di famia. Pone bou di supervishon temporal ta dura máksimo 3 luna. Den e periodo ei e investigadó di e konseho ta investigá e situashon na kas i ta duna hues un konseho. Hues ta determiná si pone bou di supervishon temporal òf interná pafó di kas por stòp òf mester keda prolongá ku máksimo 1 aña.

Interná pafó di kas
Tin bia e preokupashon tokante e mucha ta asina serio ku ta mihó pa e mucha bai biba un tempu un otro kaminda. E mucha ta biba e ora ei pa un periodo akordá serka famia, den un instituto òf un famia di kriansa. E mayornan por mantené kontakto ku e mucha, a ménos ku e tutor di famia ta di opinion ku ta mihó pa no tin kontakto un ratu. Meta di esei ta semper pa garantisá ku e mucha por regresá kas. Si despues di un aña esaki no ta posibel ainda, hues por prolongá interná pafó di kas.

Terminashon di outoridat di mayor
Tin bia mayornan no ta logra mas pa kuida nan yunan, ni awor i den futuro tampoko. Den e kaso ei e investigadó di e konseho por pidi hues pa terminá e outoridat di mayor. Mayoria bia promé ku esei tabatin asuntu di pone bou di supervishon i interná pafó di kas, pero esei no ta nesesario.
Terminashon di outoridat di mayor ta nifiká ku e mayornan no ta responsabel mas pa nan yu. Nan no mag tuma desishon mas tokante e mucha. Un otro persona ta hasi esei. Ta apuntá un tutor pa e mucha i e mucha ta ser kriá serka famia, un famia di kriansa òf den un instituto. E tutor ta tene e mayornan na altura kon ta bai ku e mucha i ta determiná kon frekuente i unda e mayornan por mira e yu.