Tokante e Voogdijraad

Na 1995 e Tratado Internashonal tokante e Derechonan di Mucha a drenta na vigor na Hulanda. E punto di salida den esei ta ku un mucha mester di kuido spesial i protekshon pa motibu di su posishon vulnerabel i dependiente.

E ròl di e Voogdijraad CN

Mayornan naturalmente na promé lugá, mes ta responsabel pa esei. Nan mester kuida i eduká nan yu i stimulá su desaroyo. Si mayornan no ta (por) karga nan responsabilidat, e desaroyo di e mucha por bini na peliger. Den e kaso ei e Voogdijraad CN, komo parti di e Ministerio di Siguridat i Hustisia, tin e tarea pa protehá mucha.

Voogdijraad CN ta wòrdu konsultá òf embolbí ora ta trata di preokupashonnan serio pa e situashon di kresementu i edukashon di e un mucha di 0 te 18 aña di edat. Voogdijraad CN ta defendé e muchanan aki dor di investigá nan situashon (di famia) i konsehá tokante loke ta e mihó solushon pa e mucha. Den tur trabou di Voogdijraad CN, e interes di e mucha ta pará sentral.

Mayornan ta lanta nan yunan. Esei ta nan derechi i deber. Pero tin biaha e desaroyo di e mucha ta bini den peliger serio pa motibu ku e mayornan no por karga nan responsabilidat òf pa motibu ku yudansa boluntario ta stagna òf ta imposibel. E ora ei Voogdijraad CN, ta wòrdu embolbí i nos ta ehekutá nos tarea legal. Voogdijraad CN ta kontribuí na e siguridat di muchanan i e perspektiva di futuro di hóbennan.

Banda di esei Voogdijraad CN ta hunga un ròl, riba petishon di e hues, serka mayornan ku ta bai separá i no ta yega na un akuerdo riba palabrashonnan tokante nan yunan.  Tambe Voogdijraad CN ta investigá e situashon di hóbennan ku a drenta den kontakto ku polis i Voogdijraad CN ta konsehá tokante un kastigu adekuá. Mas aleu Voogdijraad CN ta embolbí den renunsia òf adopshon di mucha. Voogdijraad CN por wòrdu embolbí direktamente dor di un kantidat di instansianan limitá, manera instansianan hudisial (entre otro Ministerio Públiko i Polis) i instansianan di yudansa manera Kuido di Hóben i Bienestar di Famia Hulanda Karibense i Mental Health Caribbean.

Solamente si ta trata di un situashon urgente i menasante pa e mucha, otro instansia i persona por alkansá Voogdijraad CN direktamente.