Bo ta malkontentu tokante nos trabou?

E ora ei ta importante pa papia esei mas pronto posibel ku e empleado en kestion. E ora ei, nan ta purba buska un solushon huntu ku bo. Si no logra esaki, bo por entregá un keho. Voogdijraad CN ta trata kada keho ku koutela, dirigí riba solushon i ku rèspèt pa esun ku a entregá e keho.

Nos ta trata e siguiente kehonan

• Keho tokante e prosedimentu di Voogdijraad.

• Keho tokante un empleado di Voogdijraad.  Esaki por tin di haber ku:
  1.  Aktuashon robes òf falta di akshon di un empleado.
  2.  Trato desagradabel di kliente.

Kua keho nos no ta trata?

• Keho tokante kontenido di e konseho di Voogdijraad CN, òf tokante e petishon di Voogdijraad CN na e hues. Si bo no ta di akuerdo ku e konseho òf e petishon di e Voogdijraad CN, bo por trese esei dilanti den korte.
• Keho tokante ehekushon di un ponementu bou di supervishon. Pa esaki, bo por tuma kontakto ku Kuido i Hubentut Hulanda Karibense (ZJCN) ku ta enkargá ku ehekushon di órden pa ponementu bou di supervishon.

Kon bo por entregá un keho?

Bo por entregá bo keho por eskrito òf verbal denter di un aña despues ku e komportashon tokante di kua bo ke keha a tuma lugá. Ora bo ke entregá un keho verbal, un entrevista lo tuma lugá na ofisina di Voogdijraad CN, ku un funshonario di keho. Lo registrá e keho pa bo durante e entrevista.

Kon nos ta trata un keho?

For di e momentu di entrega, por pasa un máksimo di 10 siman te ora trata ku bo keho. Despues ku bo a entregá bo keho serka e funshonario di keho, promé lo hasi un chekeo pa wak si e keho ta válido. Den e kaso ei, lo invitá bo pa un kòmbersashon serka e funshonario di keho. Na tur momentu, bo por laga un abogado i/òf un persona di konfiansa asistí bo.

E funshonario di keho por disidí pa tambe invitá e empleado en kestion durante e entrevista, òf finalisá e proseso ku abo so. E funshonario di keho ta traha un relato kòrtiku di bo keho, e akshon(nan) ku el a tuma, i e motibu pakiko e intervenshonnan di e funshonario di keho tabatin un resultado positivo, sí òf nò. Abo ta haña e relato aki. Si bo no ta satisfecho ku e solushon di e funshonario di keho, lo referí bo pa direktor di e Voogdijraad pa tratamentu mas aleu.

Direktor di Voogdijraad CN ta invitá bo pa un kòmbersashon den kua bo por splika bo keho. Durante e kòmbersashon aki, mayoria biaha e konsehero di e direktor di Voogdijraad tambe ta presente. E meta di e kòmbersashon ta pa haña un solushon ku abo i Voogdijraad ta satisfecho tokante di dje. Direktor di Voogdijraad ta tuma un desishon. Lo pone bo na altura di esaki por eskrito, i lo sera e keho. Dependiente di e índole di e keho, direktor di Voogdijraad por skohe pa referí un keho pa direktor di Rijksdienst Caribisch Nederland.

Si bo ta malkontentu tokante un desishon tumá pa e direktor di Voogdijraad òf RCN, bo por kontinuá e keho serka Ombudsman.

Konseho ta informá hues

Bo kaso ainda ta bou investigashon òf hues ta tratando kuné na momentu ku bo ta entregá bo keho? E ora ei, Voogdijraad ta informá korte i otro posibel interesado mas pronto posibel tokante e keho. Entrega di un keho no ta nifiká outomátikamente ku lo posponé e investigashon di konseho.