Bo yu menor di edat ta bai Hulanda, Aruba, Sint Maarten òf Kòrsou? E ora ei bo mester apuntá un persona ku ta tuma over e responsabilidat, kuido i kriansa di bo yu den e pais di destinashon.
E mayor(nan) enkargá ku outoridat mester entregá e ora ei un petishon pa tutela temporal, minimal kuater luna promé ku e fecha di salida serka Voogdijraad CN riba e isla unda e mucha ta inskribí. Akibou bo por lesa eksaktamente kiko ta pasa ora hasi un petishon pa tutela temporal.
Sea na tempu, di manera ku por regla asuntunan importante, manera inskripshon di bo yu, na tempu. Si e petishonario ta un otro persona ku e mayor(nan) enkargá ku outoridat, e ora ei por hasi e petishon ku un apoderashon. Bo ta haña un formulario di apoderashon mas abou riba e página akí.
Si un mucha ta 17.6 luna bieu ora di salida, e ora ei bo no mester di pidi tutela temporal. Un apoderashon ku kua un adulto den e pais di destinashon por regla asuntunan pa e menor di edat, e ora ei ta sufisiente.
Kon un petishon pa tutela temporal den eksterior ta bai?
E mayor(nan) enkargá ku outoridat ta entregá un petishon pa tutela temporal minimal kuater luna promé ku e fecha di salida serka Voogdijraad CN na e isla unda e mucha ta inskribí.
Por entregá un petishon durante e oranan di konsulta sin sita di Voogdijraad CN riba djamars i djaweps entre 09:00 or i 11:00 or di mainta. Si bo no por bai Voogdijraad CN durante ora di konsulta, bo por traha un sita telefónikamente ku Voogdijraad CN unda bo ta biba.
Bo mester bin ku tur dato personal di e mayor(nan) enkargá ku outoridat, di e menor di edat i di e persona ku bo ta deseá pa ta tutor. Na parti abou di e página akí bo ta haña un lista kompleto di kiko bo tin bin kuné si bo ta entregá un petishon pa tutela temporal serka Voogdijraad CN.
Voogdijraad CN ta kontrolá bo petishon intensivo i ta entregá esaki na un investigadó di e konseho ku ta kuminsá un investigashon. Na komienso di e investigashon bo ta risibí un karta den kua ta splika e prosedura.
Si e lugá di biba di e tutor ku bo ta deseá ta den eksterior, Voogdijraad ta manda e ora ei bo petishon pa e Konseho pa Protekshon di mucha, Raad voor de Kinderbescherming (na Hulanda) òf pa Voogdijraad riba e isla unda e tutor temporal ku bo ta deseá ta biba. Nan ta hasi e ora ei un investigashon di ambiente serka e tutor temporal ku bo ta deseá. E investigadó di e konseho ta skirbi na final di e investigashon un rapòrt i ta duna un konseho den esaki. Den e konseho akí tin pará si ta na interes di e menor di edat ku e ta bai biba serka e tutor temporal. Si no a haña ningun opheshon, ta pidi e futuro tutor pa firma un deklarashon den kua e ta bai di akuerdo pa fungi komo tutor temporal.
Despues di finalisá e investigashon ta manda e resultadonan di e investigashon i e deklarashon di e tutor proponé pa Voogdijraad na Hulanda Karibense. Si e investigashon ta kumpli ku tur rekisito, esaki ta nifiká ku e resultado di e investigashon ta positivo. Ta invitá bo e ora ei pa pasa serka Voogdijraad CN pa diskutí e konseho. Den kaso di un konseho positivo bo mester firma un deklarashon den kua bo ta bai di akuerdo pa suspendé bo di e outoridat di mayor. Ta duna bo despues tur dokumento pa bo bai kuné i bo por entregá esakinan na korte.
Bo mes mester entregá e dokumentonan na korte. E gastunan ta suma 28 dòler i ta pa bo propio kuenta. Tin bia ta kaba trata e kaso den e pais di e tutor proponé, na Hulanda esei ta varia segun region.
Korte lo plania un seshon: e seshon di korte. E mayornan ta risibí un invitashon pa esaki i tin bia e yu tambe si ainda e no a bai den eksterior. Despues ku hues a duna un veredikto, bo ta risibí un dokumento: un desishon. Den esaki tin e veredikto pará. Ku e desishon akí e tutor temporal por atendé interes di bo yu menor di edat.
Si bo yu ta bai Hulanda, e ora ei Raad voor de Kinderbescherming ta kontrolá despues di tres luna si tur kos ta bai bon ku e mucha ku a bin biba na Hulanda.