Reglanan di lei ora di divorsio

Pa mayornan ku ta bai for di otro, tin reglanan segun lei na vigor tokante kuido i responsabilidat pa e muchanan.

Mayornan ta keda konhuntamente responsabel

Na Hulanda Karibense hopi bia tur dos mayor ta keda ku outoridat riba nan yunan despues di un divorsio. Esaki ta nifiká ku ámbos ta responsabel pa kuido i kriansa. Muchanan i ámbos mayor tin derecho riba kontakto i informashon. Ademas e mayornan mester keda tuma desishonnan importante huntu tokante e muchanan. Tin bia hues ta disidí ku un mayor ta haña outoridat, si e situashon ta rekerí esei.

Informashon i konsultá

E mayornan mester duna otro informashon tokante asuntunan importante di e muchanan. Por ehèmpel tokante kon e muchanan ta presta na skol òf kon ta bai ku nan salú. Esaki nos ta yama e derecho riba informashon.

Ora di desishonnan importante un mayor mester puntra e otro mayor su opinion. Pensa por ehèmpel riba un desishon tokante un intervenshon médiko importante. Esaki yama e derecho di konsultá.

Repartishon di kuido i kriansa

Si ámbos mayor tabatin outoridat riba e muchanan promé ku e divorsio, tin bia nan ta keda ku e outoridat despues di e divorsio tambe. Nan mester palabrá ku otro kon nan ta repartí kuido i kriansa. Si no logra yega na palabrashonnan, nan por pidi hues pa tuma un desishon tokante repartishon di kuido.

Areglo di kontakto

Tin situashon kaminda ta 1 mayor so tin e outoridat. E mayor ku tin e outoridat yama e mayor enkargá ku outoridat. E otro mayor yama e mayor ku no ta enkargá ku outoridat.

Huntu mayornan ta stipulá un areglo di kontakto òf ta pidi yudansa di Jeugdzorg CN den esaki. Den un areglo di kontakto tin pará ki ora i kon frekuente e mayor ku no ta enkargá ku outoridat ta mira e mucha.

Si e mayornan no ta logra sali afó huntu, e ora ei e hues por stipulá un areglo. Tin bia por papia tambe di un areglo di kontakto den kaso di mayornan ku konhuntamente ta karga e outoridat.

Si e ta hasi daño na un mucha pa keda wak e mayor ku no ta enkargá ku outoridat, e ora ei hues por disidí tambe ku esei no tin mag mas. Hues ta hasi esei solamente pa sierto motibunan:

  • Si e kontakto ku e mayor ku no ta enkargá ku outoridat ta trese desbentahanan serio pa desaroyo mental òf físiko di e muchanan.
  • Si ta konsiderá ku e mayor ku no ta enkargá ku outoridat no ta ser konsiderá apto pa tin kontakto ku e muchanan.
  • Si e muchanan tin 12 aña òf mas i nan mes tin opheshonnan serio pa anda ku e mayor ku no ta enkargá ku outoridat.
  • Si tin otro motibu pa kua no ta bon pa e muchanan tin kontakto ku e mayor ku no ta enkargá ku outoridat.

Outoridat serka 1 mayor

Si 1 mayor tin e outoridat riba e muchanan, e ora ei e otro mayor por pidi hues pa e tin kontakto ku e muchanan. Esaki ta sosodé por ehèmpel si e mayornan no tabata kasá i no a regla outoridat komun.

Outoridat di 2 mayor pa 1 mayor

Un di e mayornan, despues di e divorsio, por pidi hues pa duna e solamente e outoridat. Hues ta bai di akuerdo ku esaki solamente si resultá ku e muchanan ta haña nan mes konfrontá ku problemanan di kriansa serio. I si e chèns ku e situashon ta mehorá ta chikitu.

E mayor ku risibí outoridat por determiná unda e muchanan ta bai biba. Si un di e mayornan kier kambia e areglo di outoridat despues, e ora ei e mayor akí mester bolbe bai hues.