Mayornan mayoria bia konhuntamente ta yega na akuerdo kon nan ta bai sòru pa nan yunan despues di un divorsio. Tin bia ta surgi un konflikto, por ehèmpel tokante repartishon di e kuido òf tokante alimentashon pa yu. Pa muchanan ta dañino si mayornan ta pleita hopi.
Si mayornan huntu i ku ayudo no ta sali afó, e ora ei nan por pidi hues pa tuma un desishon, eventualmente pa medio di un abogado. Hues por pidi un konseho na Voogdijraad CN.
Si tin un konflikto tokante alimentashon pa yu, e ora ei mayornan por bai direktamente na Voogdijraad CN pa intermediashon.
Kiko ta pasa ora di un divorsio (ku konflikto)?
Ora di un divorsio mayornan mester hasi palabrashonnan konhuntamente tokante ken ta sòru ki ora pa e muchanan. Si huntu nan no ta sali afó, nan por pidi ayudo. Por ehèmpel serka un intermediadó (un ‘mediadó’) òf serka un abogado. E abogado por ta mediadó tambe.
Si e mayornan no ta sali afó ku ayudo, nan por pidi hues pa disidí kiko ta mihó. Hues por manda e mayornan atrobe serka un mediadó, pa konhuntamente yega na palabrashonnan. Òf e por pidi Voogdijraad CN un konseho tokante kua ta e mihó areglo pa e muchanan.
E investigadó di konseho ta skirbi un rapòrt na final di e investigashon i ta duna un konseho ei den. E konseho akí ta bai tokante kon e mayornan mester sòru pa e muchanan despues di e divorsio. E konseho ta bai pa hues.
Ta bin un enkuentro na korte: un seshon di korte. E mayornan ta risibí un invitashon pa esaki. Hues ta obligá di puntra muchanan for di 12 aña pa nan opinion. E tin mag di puntra muchanan mas yòn ku 12 aña pa nan opinion, pero no tin mester. Esaki semper ta sosodé sin ku e mayornan ta aserka.
Un mucha tin mag di bin e kombersashon akí ku un persona (un otro persona ku no ta e mayornan).
Hues ta skucha storia di mayornan i yu. E ta lesa e investigashon i e konseho di e investigadó di konseho.
Na final di e seshon di korte hudisial hues ta tuma un desishon, por ehèmpel tokante repartishon di e kuido i unda e yu ta biba. Normalmente ámbos mayor ta keda ku outoridat riba e mucha. Tin bia hues ta disidí otro. Kiko esaki por ta, bo ta lesa den Reglanan di lei ora di un divorsio.
Si resultá for di e investigashon di konseho ku tin problema di kriansa, e ora ei e investigadó di konseho por sigui hasi mas investigashon i wak si un medida di protekshon di bienestar di mucha ta nesesario.
