Kompensashon pa yu
Kompensashon pa yu ta un kontribushon den e gastunan pa e edukashon di bo yu(nan) di 0 te ku 18 aña di edat. Tur mayor òf mayor di kriansa ku ta siudadano di Hulanda Karibense tin derechi riba kompensashon pa yu. No ta hasi diferensia kuantu bo ta gana. Kompensashon pa yu ta un regalo, bo no mester pag’é bèk. E Unidat di RCN di SZW ta paga e kompensashon pa yu. Bo mester hasi un petishon pa risibí kompensashon pa yu.
Hasi petishon pa kompensashon pa yu
Bo por pasa serka e Unidat SZW durante ora di konsulta pa hasi un petishon pa kompensashon pa yu. Pa kada yu bo mester hasi un petishon di nobo.
Bo mester trese esaki ku bo:
- Bo sédula
- Si bo tin un partner ku ta biba na e mes adrès; (kopia di) sédula di e partner
- Un prueba di bo datonan bankario
- Si bo tin voogdij, e dekreto di voogdij
- Si bo yu ta den eksterior pa motibunan médiko; un deklarashon médiko
- Si bo yu ta permanesé den eksterior pa motibu di estudio; un deklarashon di skol
- Si bo no tin nashonalidat Hulandes, bo mester trese un pèrmit di estadia bálido di bo mes i bo yu(nan)
Ta posibel tambe pa hasi un petishon pa kompensashon pa yu, digitalmente. ‘Download’ e formulario di petishon pa kompensashon pa yu aki. Manda e dokumentonan kompletá huntu ku un scan di e dokumentonan ariba pa kinderbijslag@rijksdienstcn.com.
Sumanan Kompensashon pa yu
Klek aki pa e montantenan aktual.
Mi yu ta hasi 18 aña
Kompensashon pa yu ta un kontribushon finansiero pa e gastunan di edukashon di muchanan di 0 te 18 aña. Den e luna despues ku bo yu kumpli 18 aña e kompensashon pa yu ta para outomátikamente.
Mi yu ta bai studia
Ora bo yu ta risibí finansiamentu di estudio, bo tin derecho riba finansiamentu pa yu ketu bai si bo yu tin ménos ku 18 aña. Pues bo no tin mester di kanselá e kompensashon pa yu ora bo yu ta bai studia i ta risibí finansiamentu di estudio. Den e luna despues ku bo yu a kumpli 18 aña, e derecho riba kompensashon pa yu ta stòp i ta para e pago di kompensashon pa yu outomátikamente.
Si bo yu ta bai studia den eksterior i no a kumpli 18 aña ainda, bo mester manda nos un prueba di registrashon firmá di e instansia di enseñansa tur aña. Hasi esei mas pronto posibel despues ku bo yu a kanselá su inskripshon for di Rigistro Sivil. Esaki ta pa evitá ku nos ta para e kompensashon pa yu ora bo yu bai for di e isla pa bai biba un otro kaminda. Bo por e-mail un prueba di registrashon di e instansia unda bo yu ta bai studia pa kinderbijslag@rijksdienstcn.com.
Pa mas informashon bo ta haña aki e legislashon i regulashon ofisial tokante kompensashon pa yu.