A detené un hóben

Si polis ta sospechá un hóben di a kometé un echo kastigabel, polis ta deten’é i ta hib’é warda di polis pa interogashon. Previo na e interogashon ei e hóben tin derechi pa papia ku un abogado. Polis ta regla un abogado pa e hóben.

Durante e interogashon polis ta purba averiguá tur kos tokante e echo kastigabel. Polis ta hasi pregunta. E hóben no tin mester di duna kontesta riba esakinan. Durante e interogashon akí e abogado i/òf mayor ta presente. Polis no por interogá un menor di edat si no tin un mayor òf un adulto asigná òf un persona di konfiansa presente.

Polis ta skirbi tur loke e hóben konta. E hóben mester lesa esaki i bisa si esei ta kuadra. Tambe polis por interogá testigu- i víktimanan. Tur interogashon ta bin den e prosèsferbal.

Ora e prosèsferbal ta kla, mayoria bia e hóben mag bai kas. Mas despues e ta tende di fiskal kon ta bai sigui. E fiskal ta risibí e prosèsferbal. Si ta nesesario, e ta konsultá ku entre otro Voogdijraad. Voogdijraad ta konsehá fiskal tokante e pasonan ku mester tuma. Si fiskal disidí di persiguí, e ta puntra Voogdijraad pa hasi un investigashon.

Si despues di e interogashon polis kier tene e hóben mas largu, polis mester pidi pèrmit na fiskal. E fiskal ta interogá e hóben i ta wak si ta nesesario pa tene e hóben mas largu pa e investigashon penal. Na e interogashon akí tambe un abogado mag ta presente.

Si fiskal ta di opinion ku mag tene e hóben mas largu, e ora ei e hóben ta keda detené. Esaki ta nifiká ku e hóben por keda sinta 3 dia mas. Fiskal ta pone Voogdijraad na altura di esaki. Voogdijraad e ora ei den tres dia ta hasi investigashon di e hóben i su situashon familiar.

Voogdijraad ta hasi investigashon pa informá fiskal i hues tokante e hóben i su situashon (na kas). Un investigadó di konseho ta hiba kombersashonnan ku e mucha, mayor- i otronan ku konosé e mucha bon. E investigadó di konseho e ora ei ta bai serka e mucha na kas òf na warda di polis. E ta investigá kon grandi e riesgo ta ku e hóben lo bolbe kometé algu kastigabel.

E investigadó di konseho ta duna konseho na fiskal òf na hues tokante e kastigu òf ayudo ku pedagógikamente ta kuadra mihó ku e hóben i e echo kastigabel. Intenshon ta pa e hóben siña algu di esaki i pa den futuro no kometé echonan kastigabel mas.

Mas informashon tokante e investigashon di konseho.

Despues di e konseho di Voogdijraad fiskal por disidí ku e mes ta imponé un kastigu òf pa dagfar e hóben. Si e mes imponé un kastigu, e ora ei e hóben ta haña un kastigu alternativo òf un but i banda di esei posiblemente haña guia di rehabilitashon sosial pa hóben (jeugdreclassering). E hóben e ora ei no mester bai hues.

Si fiskal dagfar e hóben, e ora ei e hóben mester presentá den korte. Esaki ta dependé di e seriedat di e echo kastigabel i si e hóben a kometé un echo kastigabel mas bia. Echonan grave ta por ehèmpel: maltrato pisá, atrako i kiebro den kas.

E hóben ku a risibí un dagfar, mester presentá na un enkuentro den korte: un seshon di korte. Tambe mayornan ku tin outoridat riba e hóben, ta obligá pa bin e seshon. Ora ta trata di hóbennan e seshon no ta habrí pa públiko.

Durante e seshon hues ta investigá e kaso. Fiskal ta konta di kiko e ta akusá e hóben. Despues hues ta hasi pregunta na e hóben i tin bia tambe na e mayornan. Tambe hues por tende víktima-, testigu- i profeshonalnan.

Si Voogdijraad ta presente na e seshon, hues por pidi aklarashon riba e rapòrt di konseho. Na final di e seshon fiskal ta eksigí un kastigu òf un medida. Hues por duna su veredikto mesora. Si esaki no ta e kaso, e ta indiká ki dia e ta duna su veredikto.

Hues ta duna un veredikto tokante

• Si e echo di kua ta sospechá e hóben, ta probá
• Si e echo ta kastigabel i di kua echo kastigabel ta trata
• Si e sospechoso ta kastigabel.

E ta disidí si ta imponé un kastigu òf un medida i kua esei ta.

E hóben i e fiskal por apelá e sentensia akí. Si bo apelá, bo ta pidi un hues ‘mas haltu’ pa wak si e desishon tabata un bon desishon.